"Azərbaycan Dəmir Yolları" Qapalı Səhmdar Cəmiyyəti (ADY) qarşıdan gələn Ramazan və Novruz bayramları ilə əlaqədar qeyri-iş günü elan edilən 20-30 mart tarixlərində gücləndirilmiş iş rejimində fəaliyyət göstərəcək.
Shimal.News xəbər verir ki, bu barədə ADY məlumat yayıb.
Bildirilib ki, hərəkətin təhlükəsizliyinin təmin edilməsi, yüklərin və sərnişinlərin mənzil başına vaxtında çatdırılması məqsədilə bütün hərəkət vasitələrinə müntəzəm texniki baxış keçirilir, infrastrukturda davamlı yoxlamalar aparılır.
Bayram günlərində artan sərnişin tələbatını qarşılamaq və daşımaların fasiləsizliyini təmin etmək üçün bir sıra istiqamətlərə əlavə reyslər təyin edilib.
Sərnişinlərin istirahət günlərində daha çox üz tutduğu turizm bölgələrindən olan Qəbələyə səfərlərin daha komfortlu təşkili üçün 20-30 mart tarixlərində Bakı-Qəbələ-Bakı marşrutu üzrə əlavə reyslərlə xidmət göstəriləcək. Qatarlar saat 07:30-da paytaxtdan Qəbələyə, 19:00-da Qəbələdən Bakıya yola düşəcək.
20 və 21 mart tarixlərində Gəncə-Qəbələ-Gəncə xətti ilə səfərlər isə ənənəvi qrafik əsasında həyata keçiriləcək.
Digər turizm bölgələri olan Şəki, Qax, Zaqatala və Balakənə ADY ilə səyahətlərə artan tələbatdan asılı olaraq 18, 19, 20, 27 və 29 mart tarixlərində Bakı-Balakən-Bakı marşrutu üzrə qatarlara əlavə vaqonlar qoşulub.
ADY-nin 24/7 fəaliyyət göstərən 1822 əlaqə mərkəzi də bayram günlərində gücləndirilmiş rejimdə çalışacaq.
Sərnişinlər qatarların hərəkət cədvəli ilə tanış olmaq və bilet əldə etmək üçün www.ady.az saytına keçid edə və ya "ADY Mobile" tətbiqini yükləyə bilərlər.
