Quba Rayon Mərkəzi Xəstəxanasında əməkhaqlarının gecikməsi ilə bağlı vəziyyət getdikcə daha da kritik həddə çatıb. Artıq martın 17-si olmasına baxmayaraq, mindən çox tibb işçisi hələ də fevral ayının maaşını ala bilməyib.
Shimal.News-a daxil olan məlumata görə, təxminən 1500-ə yaxın əməkdaş bu problemlə üz-üzədir. Halbuki əmək müqavilələrinə əsasən maaşlar ən gec hər ayın 10-dək ödənilməlidir. Bayram ərəfəsində – həm Ramazan, həm də Novruz öncəsi belə vəziyyətin yaşanması işçilərin narazılığını daha da artırıb.
Tibb işçiləri bildirirlər ki, digər qurumlarda bayram münasibətilə maaşların vaxtından əvvəl ödənilməsi halları müşahidə olunduğu halda, burada əks vəziyyət hökm sürür.
Məsələnin kökündə isə maliyyə idarəçiliyindəki problemlərin dayandığı iddia olunur. Bildirilir ki, ötən ilin noyabr ayında müəssisənin baş mühasibi Elşən Babayev vəzifədən azad edilib və onun külli miqdarda vəsaiti mənimsəməkdə şübhəli bilindiyi qeyd olunur. Həmin dövrdən etibarən maaş gecikmələrinin başladığı vurğulanır.
İşçilərin sözlərinə görə, hazırda baş mühasib vəzifəsi boş qalıb və yeni təyinat gözlənilir. Buna baxmayaraq, müəssisədə daha bir neçə mühasibin çalışdığı bildirilsə də, maaşların hesablanması və ödənilməsi prosesində ciddi problemlər qalmaqdadır.
"Rəhbərlikdən konkret cavab ala bilmirik. Yaxın günlərdə veriləcək deyirlər, amma pul hələ də yoxdur", – deyə narazılıq ifadə olunur.
Qeyd edək ki, bu, ilk hal deyil. Fevral və əvvəlki aylarda da oxşar gecikmələr qeydə alınıb. Hətta ötən ilin iyulunda müxtəlif rayonlarda fəaliyyət göstərən təcili tibbi yardım əməkdaşlarının da maaşlarının gecikdiyi bildirilirdi. Bu isə problemin sistemli xarakter daşıdığına dair suallar yaradır.
Hüquqşünas Ramil Süleymanov bu kimi halların necə tənzimləndiyini Shimal.News-un oxucuları üçün açıqlayıb:
"Əmək haqqının verilməsi ilə müddəalar Azərbaycan Respublikasının Əmək Məcəlləsinin 172-ci maddəsinə uyğun şəkildə tənzimlənir. Maddənin 5-ci bəndinə əsasən əmək haqqının verilməsi işə götürənin təqsiri üzündən gecikdirilirsə və fərdi əmək mübahisəsinin yarandığı halda işçilərin hüququ var ki, məhkəməyə müraciət edərək hər gecikdirilmiş gün üçün işçiyə əmək haqqının ən azı bir faizi məbləğində ödənc verilməsini tələb etsinlər".
Bütün bu faktlar fonunda əsas sual açıq qalır: yüzlərlə tibb işçisinin aylardır davam edən maaş problemi niyə hələ də həll olunmur və məsul qurumlar niyə susur? Bayram ərəfəsində insanların sosial durumunu bu həddə çatdırmaq nə dərəcədə qəbulolunandır?
Məsələ ilə bağlı Quba RMX-nin mətbuat xidməti bildirir ki, TƏBİB-ə sorğu ünvanlanmalıdır. TƏBİB isə Quba RMX-da maaşların gecikməsi ilə bağlı susmağa üstünlük verir. Göndərilən sorğu cavabsız qalıb.
