Buzlaşmış yollarda yarana biləcək fəsadlarla bağlı sürücülərə xəbərdarlıq edilib.
Shimal.News xəbər verir ki, bu gün havanın teperaturunun nisbətən yüksəlməsi səbəbindən yollarda qar-buz örtüyü bir qədər əriyib. Lakin, axşama doğru teperaturun mənfiyə doğru dəyişməsi ilə ərimiş suyun yenidən donması və yolların buzlaşması gözlənilir.
Baş Dövlət Yol Polisi İdarəsi şaxtalı havada xüsusilə külək tutan açıq ərazilərdə, enişli-yoxuşlu yollarda, körpülərdə sürüşmə ehtimalının dəfələrlə artacağını nəzərə alaraq, sürücülərdən səfərlərini mümkün qədər günün işıqlı vaxtına planlaşdırmağı, zəruri ehtiyyat tədbirləri görməyi, qış mövsümünə uyğun təchiz edilməmiş nəqliyyat vasitələri ilə yola çıxmamağı, təcrübəsiz sürücülərdən sükan arxasına əyləşməməyi xahiş edir.
Qarlı, buzlu yollarda sürüşmə ehtimalını nəzərə alaraq, piyadalara da ehtiyatlı olmaq, yolun hərəkət hissəsinə çıxmamaq, təhlükəsizlik qaydalarına ciddi əməl etmək tövsiyə olunur.
