Xudat şəhəri Süleyman Stallı küçəsi tam bərbad vəziyyətdədir. Həyat mənbəyi olan su bir damcı belə gəlmir, küçə uzun müddətdir qazıntı və yarımçıq işlərin qurbanına çevrilib.
Shimal.News-a danışan sakinlər deyir ki, payız aylarından başlayaraq "Azərsu" ASC küçədə su xətlərinin yenilənməsi adı altında qazıntı işləri aparıb. Nəticədə yol dağıdılıb, mövcud xətlər kəsilib, kanalizasiya sistemi sıradan çıxarılıb. Yeni borular isə işlək deyil.
"Sıradan çıxartdıqları kanalizasiya borularını bərpa etmədilər. Öz gücümüz və vəsaitimizlə təmir etdik. Susuz qalmışıq, amma su idarəsindən cavab gəldi: "Su gəlir, mator quraşdırın". Bu nə axmaqlıqdır? Köhnə xətlərdə zəif də olsa su axırdı," – deyə sakinlər sərt tənqid ediblər.
Küçə bərbad hala salınıb, sakinlərin həyatı təhlükədədir və məsul qurumun laqeydliyi böyük narazılıq yaradır.
Vətəndaşlar "Azərsu" ASC və müvafiq yerli icra orqanlarından problemin aradan qaldırılması üçün zəruri addımları atmaq tələb edirlər.
