Azərbaycanın İsraildəki səfirliyində "Əsrlərdən gələn ənənə" sənədli filminin təqdimat mərasimi keçirilib.
Shimal.News xəbər verir ki, rejissoru Rüfət Əsədov, prodüseri Shaul Siman olan ekran əsəri Azərbaycan və İsrail kinematoqrafçılarının birgə istehsalıdır.
Azərbaycan səfirliyinin və Sholumi Mədəniyyət Mərkəzinin birgə təşkilatçılığı ilə keçirilən tədbirdə səfir Muxtar Məmmədov çıxış edərək İsrail və Azərbaycan arasında dostluq və qarşılıqlı hörmətə əsaslanan münasibətlərin son illərdə strateji tərəfdaşlıq səviyyəsinə yüksəldiyini vurğulayıb. O, filmin iki ölkə arasındakı mədəni əlaqələrin inkişafına töhfə verəcəyinə əminliyini ifadə edib.
Rüfət Əsədov bildirib ki, film Azərbaycanın əsrlər boyu müxtəlif sivilizasiyaların qovuşduğu məkan kimi formalaşan multikultural və tolerant mühitini əks etdirir.
Filmin növbəti təqdimatı Qüds şəhərində Azərbaycan–İsrail Beynəlxalq Assosiasiyası və "Sholumi" Mədəniyyət Mərkəzinin təşkilatçılığı ilə baş tutub. Tədbirdə şəhərin müxtəlif icmalarının nümayəndələri iştirak ediblər.
Qeyd edək ki, ekran əsəri xalçaçı-rəssam, kolleksioner və dağ yəhudilərinin mədəni irsinin tədqiqatçısı Albert Rəfiyevin yaradıcılığına həsr olunub. Filmin qəhrəmanı əslən Qırmızı Qəsəbədən olub, yaradıcılığında Azərbaycan və yəhudi xalqlarının mədəniyyətlərini birləşdirir.
Film artıq ABŞ, Almaniya, Niderland, Çexiya və Rusiyadan nümayişlə bağlı təkliflər alıb.
