Quba rayonunun Zeyid kəndinə gedən yolun acınacaqlı vəziyyəti ilə bağlı aylar əvvəl qaldırılan problem hələ də həllini tapmayıb.
Shimal.News-a müraciət edən kənd sakinləri aidiyyəti qurumların diqqətini problemin həllinə yönəltməyi xahiş ediblər.
Sakinlərin sözlərinə görə, asfalt yoldan kəndə qədər uzanan 17 kilometrlik hissə hələ də keçilməz vəziyyətdədir. Bəzi hissələrdə torpaq sürüşmələri baş verib. Kəndə xüsusi avtomobillərlə belə getmək mümkün deyil.
Sakinlər bildirirlər ki, gündəlik həyatları iflic olub. Ərzaq məhsullarının daşınması, xəstələrin tibb müəssisələrinə çatdırılması, məktəblilərin və digər sakinlərin rayon mərkəzinə gediş-gəlişi kimi əhəmiyyətli məsələlərdə ciddi çətinlik yaranıb.
Onların sözlərinə görə, insanlar avtomobil yolu ilə hərəkət edə bilmədikləri üçün otlaq sahələrindən keçərək mənzil başına çatmağa məcbur olurlar.
Xatırladaq ki, məsələ ilə bağlı daha əvvəl 5 saylı Yol İstismarı MMC-dən bildirilmişdi ki, problemli əraziyə texnika və canlı qüvvə cəlb olunub, yolun 7-ci kilometrliyində işlər aparılır və gecikmənin səbəbi intensiv yağıntılarla əlaqədardır.
Quba Rayon İcra Hakimiyyəti isə açıqlamasında son aylarda yağan güclü yağışların yaratdığı fəsadların mərhələli şəkildə aradan qaldırıldığını və Zeyid kəndinə gedən yolun da bərpa olunacağını bildirmişdi.
Lakin sakinlərin Shimal.News-a göndərdikləri son videogörüntülər göstərir ki, problem hələ də öz həllini tapmayıb. Kənd əhalisi aidiyyəti qurumlardan yolun qısa müddətdə əsaslı şəkildə bərpa edilməsini, insanların normal və təhlükəsiz gediş-gəlişinin təmin olunmasını xahiş edir.
