Xaçmaz rayonunun Niyazabad kəndi istiqamətində yerləşən zibil poliqonu ilə bağlı problem aylar keçməsinə baxmayaraq hələ də həllini tapmayıb.
Söhbət əvvəllər İzmayılovka yaşayış məntəqəsi ərazisində yerləşən, sonradan isə Niyazabad yolu üzərində Ağçay, İlxıçı və Qarabağlı kəndlərinin yaxınlığına köçürülən məişət tullantıları poliqonundan gedir.
Shimal.News-a yenidən müraciət edən Ağçay kənd sakinləri bildirirlər ki, yaşayış evləri və əkin sahələrinin yaxınlığında yerləşən zibillik ərazidə ekoloji və sanitariya vəziyyətini ağırlaşdırmaqda davam edir. Onların sözlərinə görə, tullantılar açıq havada toplanır və vaxtaşırı yandırılır. Nəticədə ətrafa yayılan qatı tüstü və kəskin üfunət qoxusu sakinlərin gündəlik həyatını çətinləşdirir.
Sakinlər hesab edirlər ki, yaranmış vəziyyət xüsusilə uşaqların və yaşlıların sağlamlığı üçün ciddi risk yaradır. Onların sözlərinə görə, son vaxtlar tənəffüs yolu xəstəlikləri artıb, poliqondan sızan çirkab torpağa və yeraltı sulara qarışaraq əkin sahələrinə, eləcə də quyu sularına ziyan vurur. Bundan başqa, antisanitar vəziyyət səbəbindən ərazidə gəmiricilərin və müxtəlif xəstəlik daşıyıcısı olan həşəratların sayı da çoxalıb.
Qeyd edək ki, Shimal.News bu problemlə bağlı ilk xəbəri 3 aprel 2026-cı il tarixində yayımlayıb. Həmin materialın dərcindən sonra Xaçmaz Rayon İcra Hakimiyyəti bildirib ki, "qeyd olunan məsələnin həlli ilə əlaqədar Xaçmaz MKTİ-yə müvafiq tapşırıqlar verilib".
Lakin həmin açıqlamadan aylar keçməsinə baxmayaraq, problem həllini tapmayıb. Poliqon əvvəlki qaydada fəaliyyətini davam etdirir, tullantılar yandırılır, ətrafa yayılan tüstü və üfunət qoxusu isə yaxınlıqdakı kəndlərin sakinlərini narahat etməkdə davam edir.
Sakinlər aidiyyəti qurumlardan məsələnin yenidən araşdırılmasını, yaşayış məntəqələrinin yaxınlığında yerləşən zibil poliqonu ilə bağlı təxirəsalınmaz tədbirlərin görülməsini və illərdir davam edən problemin nəhayət həll olunmasını tələb edirlər.
