Quba, Qusar, Xudat və daha 10 marşrut üzrə şəhərlərarası və rayonlararası müntəzəm avtobus marşrutlarına onlayn biletlər “biletim.az” portalı üzərindən satışa çıxarılıb. Bu haqda ShimalNews 17 dekabr tarixində Rəqəmsal İnkişaf və Nəqliyyat Nazirliyinə istinadən məlumat verir.
Portala ilkin mərhələdə 25 daşıyıcı qoşulub. Biletləri 10 gün əvvəldən və nağdsız ödəniş etməklə əldə etmək mümkündür. Bu, müştəri məmnuniyyətinin təmin edilməsi və vaxta qənaət etmək məqsədini daşıyır.
Bilet almaq üçün “biletim.az” saytında, eləcə də “App Store” və “Google Play”dən “Biletim” mobil tətbiqini yükləmək mümkündür. Portala daxil olduqda qeydiyyatdan keçmək lazımdır.
Onlayn bilet sistemi bu sahədə xidmət göstərən bütün daşıyıcıları və avtovağzalları mərhələli şəkildə əhatə edəcək.
