Azərbaycan Respublikası Qida Təhlükəsizliyi Agentliyinin (AQTA) həyata keçirdiyi "Erkən kəsimə son!" maarifləndirmə kampaniyası çərçivəsində Qusar və Xaçmaz rayonlarında növbəti məlumatlandırma tədbirləri keçirilib.
AQTA-nın regional bölmələrinin əməkdaşları tərəfindən ət kəsimi məntəqələrində təşkil olunan aksiyalar zamanı fermerlərə, heyvandarlıqla məşğul olan şəxslərə və məntəqə əməkdaşlarına maarifləndirici buklet və flayerlər paylanılıb.
Tədbirlərdə iştirakçılara quzuların erkən yaşda kəsilməsinin yaratdığı mənfi nəticələr barədə ətraflı məlumat verilib. Bildirilib ki, erkən kəsilən heyvanlardan əldə olunan ət tam formalaşmadığından qida dəyəri daha aşağı olur. Bundan əlavə, bu tendensiya heyvanların genetik potensialının zəifləməsinə, məhsuldarlığın azalmasına və ölkədə ət istehsalının davamlı inkişafına mənfi təsir göstərir.
AQTA nümayəndələri vurğulayıblar ki, erkən kəsimin qarşısının alınması təkcə heyvandarlığın inkişafı üçün deyil, həm də ərzaq təhlükəsizliyinin təmin olunması baxımından mühüm əhəmiyyət daşıyır.
Qeyd edək ki, "Erkən kəsimə son!" kampaniyasının əsas məqsədi fermerlər və heyvandarlıq sahəsində çalışan şəxslər arasında maarifləndirməni gücləndirmək, erkən kəsimin yaratdığı risklər barədə ictimai məlumatlılığı artırmaq və bu istiqamətdə ictimai dəstəyi genişləndirməkdir.
Kampaniyaya indiyədək millət vəkilləri, ictimai fəallar və tanınmış blogerlər də qoşularaq dəstək veriblər. Onlar müxtəlif platformalarda çıxış edərək quzuların erkən kəsilməsinin qarşısının alınmasının ölkədə heyvandarlığın inkişafı və ərzaq təhlükəsizliyinin möhkəmləndirilməsi baxımından vacibliyini diqqətə çatdırırlar.
