Azərbaycan Ordusunun şanlı tarixində mühüm yer tutan 2016-cı ilin Aprel döyüşlərindən 10 il ötür.
Shimal.News xatırladır ki, həmin il aprelin 2-dən 5-dək davam edən döyüşlər zamanı Azərbaycan Ordusu Ermənistan silahlı qüvvələrinin cəbhə xəttində törətdiyi təxribatlara cavab olaraq əks-hücum əməliyyatı həyata keçirib. Nəticədə strateji əhəmiyyətə malik bir sıra yüksəkliklər və mövqelər, ümumilikdə 2000 hektardan çox ərazi işğaldan azad olunub.
Döyüşlər əsasən Ağdərə–Tərtər–Ağdam və Füzuli istiqamətlərində aparılıb. Azərbaycan Ordusu Talış kəndi ətrafındakı yüksəklikləri, həmçinin Füzuli rayonunda yerləşən strateji əhəmiyyətli Lələtəpə yüksəkliyini azad edib.
Rəsmi məlumatlara görə, döyüşlər zamanı düşmənin xeyli sayda canlı qüvvəsi, onlarla tankı, artilleriya qurğusu və hərbi texnikası məhv edilib.
Aprel döyüşləri Ermənistanın uzun illər davam edən işğal siyasətinə ciddi zərbə vurmaqla yanaşı, Azərbaycan Ordusunun gücünü və döyüş qabiliyyətini nümayiş etdirdi. Bu qələbə 2020-ci ildə baş vermiş 44 günlük Vətən müharibəsində əldə olunan tam zəfərin başlanğıcı kimi qiymətləndirilir.
