Bir sıra ərazilərdə yerləşən tut ağaclarına qurdlar daraşıb. Amerika ağ kəpənəyi adlanan bu həşərat yarpaqlarla qidalanaraq, ağaclara zərər verir.
Bu zərərverici Quba-Xaçmaz, Zaqatala-Balakən, Lənkəran-Astara bölgələri və Abşeron rayonu ərazilərində müşahidə olunur. Kənd Təsərrüfatı Nazirliyi bildirib ki, hazırda zərərvericiyə qarşı intensiv mübarizə aparılır.
Amerika ağ kəpənəyi polifaq (çox yeyən) zərərverici hesab olunur və 230-a qədər ağac-kol və ot bitkisi ilə qidalanır. Onun tırtılları tərəfindən yarpaqların kütləvi şəkildə yeyilməsi bitkilərin zəifləməsinə və nəticədə tamamilə məhv olmasına gətirib çıxarır.
Zərərverici müşahidə edilən ağaclar üzərində tırtılların əmələ gətirdikləri torlu yuvalar kəsilərək tırtıllarla birlikdə məhv edilməli, ağaclar isə dərhal insektisidlərin biri ilə dərmanlanmalıdır. Dərmanlama kiçik yaşlı tırtılların kütləvi əmələ gəlməsi dövründə daha çox səmərə verir. Ağacların gövdə və skelet budaqları ölü qabıqdan təmizlənməli, əhənglənməli və bitki qalıqları məhv edilməlidir.
Mənbə: Lent.az
