Quba rayonunun Almaz Qazmalar kəndinə gedən avtomobil yolunda yaranmış təhlükəli vəziyyət hələ də aradan qaldırılmayıb.
Shimal.News-un məlumatına görə, aprel ayından qəzalı vəziyyətdə olan yol son günlər yağan intensiv yağışlar nəticəsində daha da zədələnib. Yolun bir hissəsi çökərək yararsız hala düşüb.
Asfalt örtüyü geniş sahədə dağılıb, dərin yarğanlar əmələ gəlib və nəqliyyat vasitələrinin hərəkəti üçün ciddi təhlükə yaranıb. Yolun kənarlarında torpaq yuyulması davam etdiyi üçün yeni çökmələrin baş verməsi riski artır.
Sakinlərin sözlərinə görə, yaranmış problemə baxmayaraq, indiyədək yolun bərpası istiqamətində ciddi tədbir görülməyib. Bu isə kənd əhalisinin rayon mərkəzinə gediş-gəlişində çətinliklər yaradır.
Kənd sakinləri aidiyyəti qurumların əraziyə baxış keçirməsini və yolun qısa müddətdə əsaslı şəkildə bərpa olunmasını istəyirlər.
