Xaçmaz rayonunun İdrisoba kəndində yolların bərbad vəziyyəti yerli sakinlərin əsas problemlərindən biri olaraq qalır.
Shimal.News-a kənd sakinlərinin göndərdiyi görüntülər bu ərazinin sanki “off-road” yarış meydanı olduğunu göstərir. Əslində isə bu, 400-dən çox əhalisi olan kəndin gündəlik istifadə etdiyi yoldur.
1989-cu ildə kəndə ilk dəfə asfalt çəkilib. Lakin 1992-ci ildə naməlum tankların bu yolla keçərək asfaltı dağıtdığı bildirilir. O vaxtdan bəri 33 il keçməsinə baxmayaraq, kənd yolları hələ də təmir olunmayıb. Hər yağışdan sonra palçığa qərq olan yol sakinlərin həyatını çətinləşdirir.
Kənddə yol problemi ilə yanaşı, digər sosial çətinliklər də var. Sovet dövründə kəndə qaz xətləri çəkilsə də, bu xətlərdən heç vaxt mavi yanacaq verilməyib. Üstəlik, illər sonra qaz xətləri də oğurlanaraq sıradan çıxarılıb. Bu gün sakinlər evlərini həyətlərindəki meyvə ağaclarını kəsib yandırmaqla isitməyə çalışırlar. Lakin meyvə ağacı odununun çox tüstü verdiyini, istilikdə isə təsirli olmadığını bildirirlər.
İdrisobanın su problemi də gündəmdədir. Sakinlərin öz hesablarına çəkdirdikləri su xətləri artıq istifadəyə yararsız vəziyyətdədir. Kəndin bir çox məhəlləsində içməli su yoxdur. Bu isə sakinlərin həyatı üçün əlavə çətinliklər yaradır.
Yerli sakinlər problemləri dəfələrlə aidiyyəti qurumlara çatdırıblar. Lakin bu şikayətlər hələ də nəticəsiz qalır. Nə yol, nə qaz, nə də su məsələsində bir irəliləyiş var.
İdrisoba kəndində sosial çətinliklərdən cana yığılan insanlar öz vəziyyətlərinin düzələcəyinə ümid edirlər. Görəsən, bu gözləntilər nə vaxt reallığa çevriləcək?
