Quba şəhərində yerləşən tarixi məkanın ətrafında yolların yararsız vəziyyətdə olması sakinlərin narazılığına səbəb olub. Turizm baxımından ölkənin önəmli bölgələrindən sayılan Qubada qonaqların rahat hərəkəti üçün infrastrukturun yaxşı vəziyyətdə olması vacib hesab edilir. Lakin mövcud vəziyyət bunun əksini göstərir.
Shimal.News-a danışan sakinlər bildirirlər ki, Musabəyov və Ərdəbil küçələrinin kəsişməsində yerləşən, XVIII–XIX əsrlərə aid tarixi memarlıq abidəsi olan Çuxur hamamın ətrafında yol səthi çala və iri çuxurlardan ibarətdir.
Onların sözlərinə görə, ərazidə nəinki turistlər, hətta yerli sakinlər belə çətinliklə hərəkət edirlər. Yağışlı havalarda çuxurlar su ilə dolur, bu isə sürücülər üçün əlavə problemlər yaradır. Nəticədə avtomobillər tez-tez nasaz hala düşür və sakinlər əlavə xərclərlə üzləşirlər.
Qeyd edək ki, sözügedən ərazi Quba şəhərinin mərkəzində yerləşən və gümbəzli quruluşu ilə seçilən Çuxur hamamın yaxınlığıdır. Bu tarixi abidə şəhərin əsas turizm nöqtələrindən biri hesab olunur.
Sakinlər həm yerli əhali, həm də turistlərin istifadə etdiyi bu ərazidə yolların təmir olunmasının zəruri olduğunu bildirir, aidiyyəti qurumlardan problemin qısa zamanda həllini gözlədiklərini qeyd edirlər.
