Quba şəhərində piyadalar üçün nəzərdə tutulmuş səkilərdə aparılan təmir işləri suallar doğurur.
Shimal.News-un məlumatına görə, hazırda işlər Heydər Əliyev prospekti, Tofiq Əhmədov və Əliheydər Orucov küçələrində həyata keçirilir. Sözügedən ünvanlara canlı qüvvə və texnika cəlb olunsa da, görülən işlərin məqsədəuyğunluğu sakinlər arasında müzakirə olunur.
Piyada səkilərində nisbətən yeni asfalt örtüyü sökülərək daş döşəmə ilə əvəzlənir. Sakinlər bildirirlər ki, xüsusilə Tofiq Əhmədov küçəsində səkilər cəmi ilyarım əvvəl asfaltlanıb və istifadəyə tam yararlı olub.
"Burada səki çox yaxşı vəziyyətdə idi. İndi isə heç bir zərurət olmadan asfalt dağıdılır. Şəhərdə hələ də bərbad gündə olan küçə və səkilər varkən, bu cür işlər açıq-aşkar vəsait israfını xatırladır", – deyə sakinlərdən biri narazılığını ifadə edib.
Qubada aparılan abadlıq işlərinin hansı meyarlara əsaslandığı, yeni salınmış asfaltın niyə söküldüyü və görülən işlərin səmərəliliyi ilə bağlı suallar hələ də açıq qalır. Aidiyyəti qurumların mövqeyi açıqlanarsa, məlumat ictimaiyyətə təqdim olunacaq.
