Şabran rayonunda 5 kəndi birləşdirən körpünün yararsız vəziyyətdə qalması sakinlərin narazılığına səbəb olub.
Məsələ ilə bağlı Shimal.News-a danışan yerli sakinlərin sözlərinə görə, sözügedən körpü bu ilin aprel ayında baş verən sel nəticəsində tamamilə yararsız hala düşüb.
"Hadisədən aylar keçsə də, hər hansı təmir-bərpa işi görülməyib. Körpünün bu vəziyyətdə olması kəndlərarası gediş-gəlişi xeyli çətinləşdirir. Biz alternativ, təhlükəli yollardan istifadə etməyə məcbur qalırıq", - deyə sakinlər bildiriblər.
Sakinlər aidiyyəti qurumlardan körpünün vəziyyətinə baxılmasını və təmir-bərpa işlərinin təcili şəkildə aparılmasını xahiş edirlər.
Qeyd edək ki, 16 aprel 2025-ci il tarixində yağan intensiv yağışlar Şabran rayonundan keçən Şabrançay və Dəvəçiçay çaylarında selə səbəb olub.
Nəticədə çayların daşması rayonun yol infrastrukturuna, o cümlədən Ceyranlı kəndi ərazisində yerləşən və 5 kəndi birləşdirən körpüyə ciddi ziyan vurub.
