Siyəzən şəhəri C.Cabbarlı adına 1 nömrəli tam orta ümumtəhsil məktəbinin musiqi müəllimi Çinarə Əfqan qızı Əkbərova sertifikasiya imtahanında yüksək nəticə göstərib.
6 illik pedaqoji staja malik müəllim iyunun 18-də keçirilən sertifikasiya imtahanında cəmi 49 dəqiqə ərzində 56 bal toplayıb.
Çinarə Əkbərova Shimal.News-a bildirib ki, imtahanda təqdim olunan suallar müəllimlərin peşəkar bilik və bacarıqlarını qiymətləndirməyə yönəlib və asan, orta, çətin, eləcə də düşündürücü tapşırıqlardan ibarət olub. Onun sözlərinə görə, diqqətlə hazırlaşan müəllimlər üçün sualları cavablandırmaq mümkün idi.
Müəllim qeyd edib ki, imtahana planlı və müntəzəm şəkildə hazırlaşıb, mövzuları təkrar edib və vaxt məhdudiyyəti daxilində testlər işləyib. O hesab edir ki, bu üsul həm sualları daha sürətli cavablandırmağa, həm də vaxtdan səmərəli istifadə etməyə imkan yaradır.
Çinarə Əkbərovanın fikrincə, sertifikasiya prosesi müəllimlərin bilik və bacarıqlarının inkişafına, öz üzərlərində daha çox işləmələrinə stimul verir və təhsilin keyfiyyətinin yüksəldilməsinə xidmət edir. O, həmkarlarına müntəzəm hazırlaşmağı, vaxtı düzgün bölüşdürməyi və davamlı şəkildə öz üzərlərində işləməyi tövsiyə edib.
Qeyd edək ki, Çinarə Əkbərova orta təhsilini Qusar şəhərində yerləşən B. Ağaərdiyev adına 1 nömrəli tam orta məktəbdə alıb.
