Qubanın Möhüc kəndində köhnəlmiş elektrik xətləri sakinləri təhlükə ilə üz-üzə qoyub.
Shimal.News xəbər verir ki, kənd sakinləri elektrik təsərrüfatının qəzalı vəziyyətdə olmasından narazıdırlar.
Onların sözlərinə görə, 1980-ci illərdə aparılan quruculuq işlərindən sonra elektrik dirəkləri və xətlər yenilənməyib. Yalnız bəzi abonentlər şəxsi vəsaitləri hesabına naqillər çəkiblər ki, onlar da hazırda istismar üçün yararsız vəziyyətə düşüb. Bu isə təhlükəni daha da artırır.
Sakinlər bildirirlər ki, məsələ ilə bağlı dəfələrlə müraciət etsələr də, problem həll olunmamış qalır. Halbuki ətraf kəndlərdə elektrik xətləri yenilənir. Oxşar vəziyyətin Gültəpə kəndində də müşahidə olunduğu qeyd edilir.
Mövcud vəziyyət xüsusilə pis hava şəraitində tez-tez elektrik kəsintilərinə səbəb olur. Nəticədə 1500-dən çox sakin çətinliklə üzləşir.
Vətəndaşlar problemin operativ şəkildə həll olunmasını tələb edirlər.
