Martın 31-i – Azərbaycanlıların Soyqırımı Gününün 108-ci ildönümü ilə əlaqədar Quba Soyqırımı Memorial Kompleksi səhər saatlarından etibarən kütləvi şəkildə ziyarət edilir.
AZƏRTAC xəbər verir ki, ziyarətçilər arasında dövlət və hökumət nümayəndələri, Milli Məclisin deputatları, müxtəlif qurumların kollektivləri, siyasi və ictimai təşkilatların üzvləri, eləcə də ölkənin müxtəlif bölgələrindən gələn şagird və tələbələr, yerli və xarici vətəndaşlar yer alır.
Memorial Kompleksdə 31 Mart – Azərbaycanlıların Soyqırımı Gününə həsr olunmuş foto və kitab sərgisi təşkil edilib. Ziyarətçilərə ermənilərin törətdikləri soyqırımı barədə ətraflı məlumat verilir, bələdçilər tərəfindən məlumatlandırma Azərbaycan, ingilis, rus və ərəb dillərində aparılır.
Qeyd edək ki, 2013-cü ildən fəaliyyət göstərən Quba Soyqırımı Memorial Kompleksi bu günədək ümumilikdə 1,25 milyondan çox ziyarətçi qəbul edib. Bunların təxminən 200 mini xarici vətəndaşlardır.
