Qubanın Zərdabi qəsəbəsində sahibsiz itlərin sayı əhəmiyyətli dərəcədə artıb. Son aylarda daha çox mərkəzi küçələrdə it sürülərinə rast gəlinir.
Bu barədə Shimal.News-a məlumat verən sakinlər bildirirlər ki, bu hal onların gündəlik həyatının normal axarına ciddi maneə yaradır. Əsasən də məktəbə yollanan şagirdlər tez-tez sahibsiz itlərin hücumuna məruz qalırlar.
“Uşağımı məktəbə tək buraxa bilmirəm. İki dəfə itlər hücum edib, çətinliklə xilas etmişik. Axı bu qədər biganəlik nəyə görədir?”, - deyə sakin Malik Həmidov bildirib.
Vətəndaşlar məsələ ilə bağlı müvafiq dövlət qurumlarına - bələdiyyə və icra nümayəndəliyinə müraciət etsələr də, hələ də hər hansı ciddi tədbir görülməyib. Hər dəfə eyni cavab: "gündəmdədir", "araşdırılır". Lakin nəticə yoxdur.
Sakinlər tələb edirlər ki, məsələ ciddi şəkildə nəzarətə götürülsün. Sahibsiz itlərə qarşı humanist və effektiv tədbirlər planı hazırlanaraq icraya başlansın. Yalnız bu yolla Zərdabidə normal, təhlükəsiz həyat bərpa oluna bilər.
