Quba rayonunun Zərdabi qəsəbəsinin sakinləri bələdiyyə sədri Kərim Məmmədovun vətəndaşlara qarşı sərgilədiyi yanaşmadan narazıdırlar.
Sakinlər Shimal.News-a bildirirlər ki, sədr bu günə qədər qəsəbədə heç bir real iş görməyib, əhalinin sosial-məişət problemləri ilə maraqlanmayıb.
Bunun əvəzində isə vətəndaşlara ard-arda vergi borcları ilə bağlı bildirişlər göndərilir. Əhali xüsusilə bildirişlərin məzmunundan narazıdır. Sənədlərdə “30 gün ərzində borc ödənilməzsə, barənizdə məhkəməyə müraciət olunacaq” ifadəsi yer alır. Sakinlər bu yanaşmanı açıq təhdid və psixoloji təzyiq kimi qiymətləndirirlər.
Məsələ ilə bağlı fikrini bildirən hüquqşünaslar isə qeyd edirlər ki, bu cür bildirişlərin göndərilməsi hüquqi baxımdan düzgün deyil. Hüquqşünas Cavid Quliyev deyir ki, vergi borcu ilə bağlı tədbir görülməzdən əvvəl, xüsusən də fiziki şəxslər üçün, onların sosial durumu və ödəmə imkanları araşdırılmalıdır:
“Əgər söhbət sadə kənd sakinlərindən və onların sosial öhdəliklərindən gedirsə, əvvəlcə onların yaşayış səviyyəsi, məşğulluq vəziyyəti nəzərə alınmalıdır. Hüquqi prosedurların tətbiqində ilk addım məhkəmə ilə hədələmək yox, dialoq və maarifləndirmə olmalıdır”.
Zərdabi sakinləri onu da vurğulayırlar ki, qəsəbədə illərdir daxili yollar bərbad vəziyyətdədir, bəzi məhəllələrdə kanalizasiya sistemi yoxdur, kommunal problemlər isə yığılıb qalıb. Bütün bu çətinliklərə baxmayaraq, bələdiyyənin yeganə “fəaliyyəti” vergi bildirişləri göndərməkdən ibarətdir.
Sakinlər aidiyyəti qurumlardan məsələyə müdaxilə edilməsini, bələdiyyə rəhbərliyinin fəaliyyəti ilə bağlı araşdırma aparılmasını və cəmiyyətə qarşı daha humanist, ədalətli yanaşmanın tətbiq olunmasını tələb edirlər.
