Zaqatala rayonunda fəaliyyət göstərən və 400-dən çox itin saxlanıldığı sığınacaq dağılmaq təhlükəsi ilə üz-üzə qalıb.
Qafqazinfo.az-ın məlumatına görə, sığınacağın sahibi, heyvansevər Nizami Ramazanov bildirib ki, bura Azərbaycanın ən böyük heyvan sığınacaqlarından biri hesab olunur və hazırda ciddi problem yaşayır.
Məsələ ilə bağlı Zaqatala Rayon İcra Hakimiyyətindən belə cavab verildi: "Araşdırma zamanı müəyyən edilib ki, sözügedən sığınacaq Zaqatala rayonunun Aşağı Tala kəndində xüsusi mülkiyyətdə olan 1,15 ha kənd təsərrüfatı təyinatlı torpaq sahəsində yerləşir.
Məsələ ilə əlaqədar torpaq mülkiyyətçisi ilə görüş keçirilib. Görüş zamanı o, ətraf ərazidə yaşayan sakinlərin şikayətləri, eləcə də torpaq sahəsinin təyinatına uyğun istifadəsinin təmin edilməsi zərurəti ilə əlaqədar olaraq bir neçə dəfə, sonuncu dəfə 2025-ci ilin avqust ayında cari ilin mart ayınadək həmin ərazinin boşaldılması üçün möhlət verdiyini bildirib və ərazinin boşaldılmasında israrlı olduğunu qeyd edib.
Bununla yanaşı, tərəfimizdən aparılan əlavə danışıqlar nəticəsində mövcud vəziyyət nəzərə alınaraq torpaq mülkiyyətçisi ilə sığınacağın başqa əraziyə köçürülməsi məqsədilə əlavə müddətin verilməsi barədə razılıq əldə olunub".
