Xudat şəhərinin mərkəzində fəaliyyət göstərən kafe və restoranlarda sanitar qovşağın olmaması ciddi fəsadlar yaradır. Əsasən şəhərin Heydər Əliyev parkı və avtovağzal ətrafındakı vəziyyəti uyğun sözlə ifadə etmək mümkün deyil.
Bu barədə Shimal.News-a yazan sakinlər qeyd edirlər ki, Xudat avtovağzalının ətrafından üfunət və sidik iyindən keçmək mümkün deyil.
"Avtovağzal ətrafında əksər kafe və restoranların tualeti yoxdur. Hava istidir, pivə içirlər, avtovağzalı Nabran yoluna birləşdirən adsız küçədə təbii ehtiyaclarını ödəyirlər. Avtovağzalda ödənişli ayaqyolu olsa da, saat 18:00-dan sonra işləmir. Həmin küçədən ailə ilə keçmək mümkün deyil, dava düşür. Sərxoş insanlara izah edə bilmirik ki, bura yoldur, ayaqyolu deyil. Sidik, üfunət qoxuyan həmin adsız küçədə qida anbarları, Xudat duşes zavodu yerləşir. Orada bulaq var, insanlar su üçün üz tuturlar. Avtovağzalın ətrafında yaranan ürəkbulandıran vəziyyət aradan qaldırılmalıdır", - deyə vətəndaşlar şikayət edir.
