Xudat Ailə Sağlamlıq Mərkəzi uzun illərdir təmir olunmayan binada, köhnəlmiş avadanlıqlarla fəaliyyət göstərir. Sovet dövründən qalan mərkəz 2020-ci ildən etibarən İcbari Tibbi Sığorta çərçivəsində fəaliyyət göstərsə də, müasir tələblərə cavab vermir.
Təmir işlərinə qismən başlansa da, proses dayandırılıb və son üç ildə heç bir irəliləyiş olmayıb. 60 minə yaxın əhalinin xidmət aldığı mərkəzdə nə ixtisaslı həkim heyəti, nə də müasir tibbi avadanlıq mövcuddur.
Shimal.News-a müraciət edən sakinlər bildirirlər ki, məcburiyyət qarşısında qalıb Xaçmaz rayonuna üz tuturlar. Bu isə əlavə xərc və vaxt itkisi ilə yanaşı, bəzi hallarda xəstələrin səhhəti üçün təhlükə yaradır.
Onlar Xudatda müasir standartlara cavab verən yeni tibb müəssisəsinin inşasını və lazımi tibbi təminatın yaradılmasını istəyirlər.
