Bizim.Media-nın məlumatına görə, qədim memarlıq ənənələrinə malik bu kənddə, xüsusilə qəzalı vəziyyətdə olan evlərdə işlərin ləng aparılması köhnə tikililər üçün təhlükə yaradır.

Sakinlərin dediklərinə görə, qədimiliyin qorunub saxlanılması şərti ilə bərpa edilməsi nəzərdə tutulan evlər qəzalı duruma düşdüyündən hər an uça bilər:

“Qışı çox əziyyətlə keçirdik. Evin tavan və divarları çat içindədir, qapı-pəncərələr bağlanmır. Ev hər an uçacaq deyə qorxu içindəyik. Xınalıqdan, Quba şəhərinə illər öncə köçüb gedən 4 nəfərin evi bərpa olunub. Kəndi tərk etməyən sakinlərin qəzalı evləri isə uçub dağılır. İllərdir gözləyirik. Dəfələrlə Dövlət Turizm Agentliyinə müraciətlər etmişəm. Hər dəfəsində də şablon, anlamadığım dildə cavablar verilir", - deyə sakin Namiq Əhmədov vurğulayıb.

Digər sakin Kənan Osmanovun evi isə tikinti şirkəti tərəfindən qəzalı vəziyyətə salınıb:

“Bilirsiniz ki, Xınalıqda qədim evlər bir-birinin içində yerləşir, yəni bir evin damı digər evin divarına düşür. Bu səbəbdən tikinti təşkilatı qonşunun evini bərpa edəndə mənim evimi pis günə qoyub. Dəfələrlə müraciət etsəm də 3 ildir, evimi bərpa etmirlər. Niyə Dövlət Turizm Agentliyi bu məsələyə məsuliyyətlə yanaşmır?”

Dövlət Turizm Agentliyinin Qoruqları İdarəetmə Mərkəzinin ictimaiyyətlə əlaqələr üzrə əməkdaşı Rufik İsmayılov məsələ ilə bağlı açıqlama verib:
“Xınalıq kəndində özünəməxsus memarlıq üslubu və coğrafi mövqeyi ilə seçilən 160 ev yaşayış məntəqəsinin tarixi hissəsində yerləşməklə, vaxtilə ənənəvi üsulla tikilib. Onlardan ən təhlükəli vəziyyətdə olan 60 evin təmir və bərpası ilə bağlı 2020-ci ildə layihələndirmə işləri həyata keçirilib. Bu layihə çərçivəsində 2020-2022-ci illərdə 16 evdə təmir-bərpa işləri aparılıb, onların bünövrə və divarları gücləndirilib. Uçma təhlükəsi olan divarlar sökülərək yenidən tikilib, dam örtükləri sökülərək yerli tipologiyaya uyğun yenidən qurulub, qapı-pəncərələr yenilənib. 14 oktyabr 2022-ci il tarixdə media nümayəndələrinin və Dövlət Turizm Agentliyinin rəhbərliyi ilə görülən işlərə baxış keçirilib. Təhvil verilən̈ işlərlə paralel olaraq 2022-ci ildə 11, 2023-cü ildə daha 15 evin təmir-bərpasına start verilib. Bu evlərdən 19-u artıq təhvil verilib, 6 evdə işlər yekunlaşmaq üzrədir. 1 evdə təmir işləri davam etdirilir. İlkin mərhələdə layihələndirilən 60 evdən 18-nin təmir-bərpasına isə yaxın gələcəkdə başlanılacaq. Bu 60 evdən başqa Xınalıq kənd sakini Namiq Əhmədovun mənzilinin də daxil olduğu daha 15 evin layihələndirmə işləri sona çatıb. Müvafiq qurumlarla razılaşdırıldıqdan sonra ayrılan vəsaitə uyğun olaraq həmin evlərin təmirinə başlanılacaq”.

Qeyd edək ki, iqlim şəraitinə uyğun olaraq Xınalıqda ilin yalnız 4-5 ayı ərzində tikinti işləri görmək mümkündür. Bu səbəbdən təmir-bərpa işləri mərhələli şəkildə aparılacaq".