Xaçmaz şəhərində Heydər Əliyev Mərkəzinin qarşısındakı parkda yaranan vəziyyət sakinləri narahat edir.
Bu barədə Shimal.News-a məlumat verən sakinlər bildiriblər ki, parkdan istifadə edə bilmirlər:
“Əksər hallarda sahibsiz itlər parkın içərisinə, ağacların kölgəsinə toplanır. Buradan keçmək təhlükəlidir. Dəfələrlə üzərimizə itlər hücum edib. Bundan əlavə parkda oturacaqlar da çox azdır. Cəmi 2 yerdə 5-6 oturacaq var. Onların da boş olduğu anı tapmaq mümkünsüzdür. Bu ətrafda çox sayda 5 mərtəbəli binalar var, əhali sıxdır. İstəyirik hava xoş olanda parkda uşaqlarımız oynasın, özümüz istirahət edək. Amma nə özümüz oturmağa oturacaq tapırıq, nə də övladlarımız itlərin qorxusundan rahat oynaya bilirlər. Parkın girişində yerləşən fəvvarə də baxımsızlıqdan, istifadə edilməməkdən paslanıb, sökülüb-dağılır”.
Qeyd edək ki, Shimal.News bu problemi bir neçə dəfə ictimailəşdirib. Sakinlərin haqlı narahatlıqları ilə bağlı aidiyyəti qurumlara səslənsək də, məsələ hələ də öz həllini tapmayıb. Ümid edirik ki, bu dəfə sakinlərin səsləri eşidiləcək və parkda təhlükəsiz, rahat mühitin yaradılması üçün konkret addımlar atılacaq.
