Xaçmaz rayon Xudat şəhərində Fövqəladə Hallar Nazirliyinin (FHN) Xüsusi Riskli Xilasetmə xidmətinin N saylı hərbi hissəsində "Şahin" hərbi-idman oyununun VIII zona mərhələsi təşkil olunub.
Shimal.News xəbər verir ki, tədbirin rəsmi açılış mərasimində gənclər və idman nazirliyinin vətənpərvərlik tərbiyəsi sektorunun müdiri Elşən Hüseynov, baş məsləhətçisi Coşqun Hidayətov, Quba-Xaçmaz Regional Gənclər və İdman İdarəsinin rəisi Qumru Məmmədova, Quba-Xaçmaz Regional Təhsil İdarəsinin müdiri Coşqun Əliyev, FHN -nin Xüsusi Riskli Xilasetmə xidmətinin N saylı hərbi hissəsinin komandiri polkovnik Fidayıl Mustafayev, digər idarə və müəssisələrin əməkdaşları iştirak ediblər.
Oyun ərzində əsasnaməyə uyğun olaraq iştirakçılar sıra hazırlığı, intellektual müsabiqə, darağa patronların doldurulması və boşaldılması, avtomatın sökülməsi və yığılması, tüfəngdən hədəfə atəş açmaq, fiziki hazırlıq, maneələrin dəf olunması, mülki müdafiə hazırlığı və çadırın qurulması mərhələlərində bacarıqlarını göstəriblər.
Qiymətləndirməyə əsasən, ən yüksək bal toplayan ilk üç yerə layiq görülən komandalar:
I yer - Xaçmaz rayon komandası,
II yer - Şabran rayon komandası,
III yer - Quba rayon komandası.
Qalib komandalara diplom və ilk yerin sahibinə "Şahin" hərbi-idman oyununun VIII zona mərhələsinin kuboku təqdim olunub.
Qeyd edək ki, bu il oyunun finalı "Gənclər Paytaxtı" Sumqayıt şəhərində keçiriləcək.
