Xaçmazda məktəbli qız qeyri-adi bacarığa malikdir. Bu barədə ShimalNews 9 dekabr tarixində Apa TV-yə istinadən məlumat verir.
Əlfəddin Rüstəmov adına Sərkərli kənd ümumi orta məktəbinin VI sinif şagirdi Ayan Əliməmmədova 1 dəqiqədə 1500 söz oxuya bilir. Bununla 240 səhifəlik kitabı cəmi bir saata tam oxuyub başa çatdırır.
Bu istedad Ayanın 7 yaşı olanda üzə çıxıb. Onda qızcığaz 1 dəqiqədə 300 söz oxuya bilirdi. O bildirir ki, ətrafdakılara aydın olmasa da, o, oxuduğu mətnin məzmununu yadda saxlayır. Sonradan isə həmin mətni nəql edə bilir.
Məktəbin Azərbaycan dili və ədəbiyyat müəllimi Şəhla Musayeva bildirib ki, sürətli oxu xüsusi göz məşqləri və texnika tələb edir:
“Sürətli oxu müasir dünyada ən çox yayılan tendensiyalardan biridir. Sürət əsri artıq ənənəvi mütaliəni qəbul etmir. Nə qədər paradoksal görünsə də, sürətli oxunan mətn, fasiləli oxunan mətndən daha yaxşı mənimsənilir. Müsbət tərəfi də ondan ibarətdir ki, şagird qısa zamanda daha çox məlumat əldə edir”.
Müəllimlər Ayanın əlaçı olduğunu və yaradıcı istedada malik olduğunu bildirirlər.
