Xaçmazlı qız dünyanın ən məşhur universitetlərinin birinə 100% təqaüdlə qəbul olunub. Bu barədə ShimalNews 24 dekabr tarixində Lent.az-a istinadən məlumat verir.
Zülfiyyə Kişiyeva ABŞ-nin və bütün dünyanın ən nüfuzlu ali təhsil müəssisələrindən biri sayılan Stanford Universitetinə daxil olub. O, 85.000 dollar (təxminən 145.000 manat) təqaüd alacağını bildirib:
"Xaçmazda anadan olmuşam. Ailəm Bakıya köçdüyü üçün təhsilimi Gənclik İstək liseyində davam etdirmişəm. İstək liseyi bağlandıqdan sonra isə Pişəvəri adına Humanitar Fənlər Gimnaziyasına getdim, bu ilin yayında oranın məzunu oldum.
Xaricdə təhsil alacağıma 6-7-ci sinifdən qərar verdim. Hazırlaşaraq SAT və İELTS kimi xarici universitetlərə qəbul imtahanlarından yüksək bal topladım. Bundan əlavə, müxtəlif universitetlərin yay kamplarında (Stanford Universitetinin Riyaziyyat Kampı, Kanada/Amerika Riyaziyyat Kampı (mathcamp.org) və s.) iştirak etmişəm.
Bu ilin noyabrında isə özüm tək olaraq (heç bir xaricdə təhsil kursunun köməyi olmadan) Stanford Universitetinə müraciət etdim. Beləliklə, dekabrın 17-si qəbul xəbərimi aldım".
Stanford Universiteti Kaliforniya ştatında yerləşir. Onu Silikon vadisinin sərvəti adlandırırlar. Amerika alimləri kəşflərinin əksəriyyəti, həmçinin elm və texnikanın ən qabaqcıl sahələri üzrə – biomühəndislikdən başlayaraq ən yeni kompüter və kosmik texnologiyaları, genetika, mədəni antropologiyaya qədər tədqiqatları bu universitetin institut və laboratoriyalarında həyata keçirirlər.
