Xaçmaz sakininin borc üstündə dostu ilə arasında yaranan mübahisə cinayət hadisəsi ilə nəticələnib.
Teleqraf.az-ın məlumatına görə, hadisə bu il martın 8-i saat 12:00-da Sumqayıt şəhərində baş verib.
Xaçmaz rayon sakini, 44 yaşlı Süleyman həmin ərazidə dostluq münasibətində olduğu Elmarı (adlar şərti verilib - red.) vuraraq ona müxtəlif dərəcəli xəsarətlər yetirib.
Süleymanın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən təqsirləndirilən şəxs bildirib ki, Elmarı bir neçə ildir tanıyır və bir neçə ay əvvəl ondan 100 manat borc alıb:
"Sonradan borcu tələb etsəm də, geri ala bilmədim. Martın 8-də yenə ona zəng edərək görüşmək istədiyimi dedim. Həmin gün saat 12:00-da Sumqayıt şəhərinin 26-cı məhəlləsində yerləşən sürücülük məktəbinin arxa hissəsində görüşdük. Elmardan borcunu niyə qaytarmadığını soruşdum, imkanı olmadığını dedi və aramızda mübahisə yarandı. Onun sifət nahiyəsinə bir yumruq vurdum, sonra aralanaraq getdim".
Cinayət işinə Sumqayıt Şəhər Məhkəməsində baxılıb. Məhkəmədə məlum olub ki, tərəflər barışıb və zərərçəkən şikayətini geri götürüb.
Bu səbəbdən təqsirləndirilən şəxs barəsindəki cinayət təqibinə xitam verilib.
