Xaçmazlı elektrik mühəndisi toyuq, qaz, ördək və başqa quşların yumurtalarından istifadə etməklə qeyri-adi suvenirlər ərsəyə gətirir. Bu barədə ShimalNews 16 fevral tarixində Azərtac-a istinadən məlumat verir.
Fərmayıl Əhmədov bu işi internet vasitəsilə öyrənib və 10 il ərzində 100-dən çox əl işi hazırlayıb. Gənc yumurtanın üzərinə zər, boya və xüsusi bəzək daşları ilə mürəkkəb naxış və elementlər əlavə edir.
“Əl işləri üçün səthi daha təmiz, möhkəm qabıqlı yumurtaları seçirəm. Daha çox ördək, böyük işlər olanda isə qaz, hətta dəvəquşu yumurtasından istifadə edirəm. Suvenir hazırlamaq üçün əvvəlcə yumurtanın içərisi boşaldılır. Bunun üçün yumurtanın hər iki tərəfindən kiçik deşiklər açılmalıdır. İçərisindəki maye süzüldükdən sonra yumurtanın qabığı xüsusi avadanlıqla oyulur. Son mərhələdə hazır suvenir xüsusi maddə ilə yuyulur ki, bu da əl işinin möhkəmliyini və bakteriyalardan qorunmasını təmin edir”, - deyə Fərmayıl Əhmədov söyləyir.
Gənc 4 ildir ki, ABAD-a (Ailə Biznesinə Asan Dəstək) qoşulub və yaratdığı əsərlər etno-butiklərdə satışa çıxarılır. Fərmayıl son əl işlərindən birinə 100 manat qiymət qoyub.
