Son günlər şimal bölgəsində, o cümlədən Xaçmazda havanın temperaturu xeyli artıb. Axşam saatlarında hava sərinlədikdən sonra sakinlər parklara üz tuturlar. Xaçmaz sakinlərinin əsas dincəldikləri məkanlardan biri də Zəfər parkıdır. Lakin bu parka gedib-gəlmək heç də asan deyil.
Shimal.News-a müraciət edən sakinlər Zəfər parkına aparan küçələrin qaranlıq olmasından narazıdırlar:
"M.Ə.Rəsulzadə, N.Ələsgərov, Qələbə, Həzi Aslanov küçələri parka aparan əsas küçələrdir. İnsanlar əsasən bu küçələrlə gedib-gəlirlər. Hava qaralardan sonra bu yollarda göz-gözü görmür. Çox qaranlıq olur. Əsas küçələrdə işıqlandırma olsa da, bu küçələr hələ də zülmət içindədir. Adıçəkilən yollardan parka avtomobili ilə gələn şəxslər də istifadə edirlər. Övladları ilə parka üz tutanlar üçün bu yollardan keçmək işgəncədir", - deyə izləyicilər qeyd ediblər.
