Xaçmaz şəhəri Mehman Babayev adına 1 nömrəli tam orta məktəb uzun müddətdir ki, təmirsiz vəziyyətdədir.
Bu barədə Shimal.News-a məlumat verən valideynlərin sözlərinə görə, məktəbin nə daxili, nə də xarici hissəsi illərdir təmir olunmur.
"Təhsil müəssisəsinin fasadı plastik və tez alışan materiallarla üzlənib ki, bu da yanğın təhlükəsini artırır. Belə halda yanğın baş verərsə, qısa zamanda bütün binaya yayıla bilər.
Dəhlizlər və sinif otaqları müasir standartlara uyğun deyil. Məktəbin ərazisində modul tipli sanitar qovşaq quraşdırılsa da, üfunət qoxusuna görə istifadə etmək mümkün olmur. Bundan əlavə, sanitar qovşağın məktəbdən kənarda, çöldə yerləşməsi qış aylarında azyaşlılar üçün ciddi çətinlik yaradır.
Hazırlıq qruplarında dərs cəmi 90 dəqiqə keçirilir. Uşaqlar dərs prosesinə yeni alışmağa başladığı anda dərs artıq bitmiş olur.
Bu problemlər Xaçmaz rayonunun mərkəzində yerləşən məktəbdə yaşanır. Təhsil müəssisəsi uzun müddətdir diqqətdən kənarda qalıb", - deyə onlar bildiriblər.
