Xəbər verdiyimiz kimi, Xaçmaz rayonunun Çaykənarı kənd sakini 42 yaşlı Həqiqət Məmmədova 17 yaşlı oğlu tərəfindən bıçaqlanıb. Xaçmaz rayon Mərkəzi Xəstəxanasına çatdırılsa da, qadının həyatını xilas etmək mümkün olmayıb.
Shimal.News-un əldə etdiyi məlumata görə, mərhumun qohumları bildiriblər ki, qətl hadisəsi telefon üstündə olub.
Qətlə yetirilən qadın bağların birində briqadir işləyib. Onun qarşı cinsin nümayəndələri ilə telefonla danışması yeniyetmə oğlunun qəzəbinə səbəb olub. Sonuncu mübahisədən sonra H.Məmmədova kənddəki qohumuna məxsus evə gedib. Bir qədər sonra onun oğlu da həmin evə gələrək anasına çoxsaylı bıçaq zərbələri vurub:
"Kəndin yolu təmirsiz və uzaq olduğu üçün təcili tibbi yardım çox gec gəldi. Xəstəxanada 1 gecə qaldı və həyatını xilas etmək mümkün olmadı", - deyə mərhumun qohumları bildiriblər.
