İntensiv və aramsız yağan yağışlar Xaçmaz rayonu ərazisində də ciddi fəsadlara səbəb olub.
Xaçmaz Rayon İcra Hakimiyyəti başçısının birinci müavini, rayon Fövqəladə Hallar Komissiyasının sədri Anar Oruclunun verdiyi məlumata görə, rayon ərazisindən keçən çaylarda suyun səviyyəsi normadan xeyli artıb.
Nəticədə yol təsərrüfatına və sosial infrastruktura ciddi ziyan dəyib. Kəndlərdə sel suları həyətləri və evləri basıb. Ən kritik vəziyyət Cığatay kəndi ərazisində qeydə alınıb. Kəndə daxil olan sel suları bir sıra həyətləri su altında qoyub.
Fövqəladə Hallar Nazirliyi-nin Şimal Regional Mərkəzinin əməkdaşları tərəfindən həmin ərazilərdən 9 nəfər təxliyə edilib. Təxliyə və xilasetmə işləri davam etdirilir.
Bundan əlavə, Aşağı Zeyid kəndi ərazisində yerləşən körpü qəzalı vəziyyətə düşüb, Hacıəlibəy qəbiristanlığı isə su altında qalıb.
Anar Oruclunun sözlərinə görə, hazırda rayona dəyən ziyanın həcmi dəqiqləşdirilir.
