Xaçmaz şəhər 8 nömrəli məktəb-liseyin ibtidai sinif şagirdlərinin valideynləri çıxılmaz vəziyyətə qalıblar.
Bununla bağlı Shimal.News-a danışan valideynlərin sözlərinə görə, 8 nömrəli məktəb-liseyin ibtidai sinif şagirdləri xəbərdar edilmədən 3 nömrəli məktəbə köçürülür.
“Bizim xəbərimiz olmadan uşaqlarımızı qəzalı vəziyyətdə olan və evlərimizdən uzaqda yerləşən 3 nömrəli məktəbə köçürürlər. Hər birimiz bu vəziyyətdən çox narahat və narazıyıq. Həmin məktəbin yalnız xarici görünüşü normaldır, amma içərisi bərbad vəziyyətdədir. Sanitar qovşaqlar pis haldadır, bir korpus bağlanıb, digər iki korpus isə divarları aşdığı üçün qəzalı vəziyyətdədir. Məktəbin içərisinə girməyimizə belə icazə vermirlər.
Həmçinin liseyin ödənişli olacağı ilə bağlı məlumat əldə etmişik.
Bizə 2 ildir ki, yeni məktəbin tikiləcəyinə söz versələr də, hələ də ortada heç bir məktəb yoxdur. Biz uşaqlarımızın təmiz və təmirli məktəblərdə təhsil almasını istəyirik”, - deyə valideynlər narahatlıqlarını dilə gətiriblər.
Valideynlər bu vəziyyətin dərhal həll olunmasını və uşaqlarının təhlükəsiz və şəraitli mühitdə təhsil almalarını tələb edirlər.
Məsələ ilə bağlı Shimal.News-a açıqlama verən təhsil üzrə ekspert Ramin Nurəliyev deyib ki, Elm və Təhsil Nazirliyi istənilən ümumtəhsil məktəbinin statusunu dəyişə və ya müəyyən fəaliyyətləri həyata keçirə bilər:
“Məsələn, təmir-tikinti işləri aparılarsa, bu zaman məktəbdəki şagirdlər başqa bir məktəbə köçürülə və ya məktəbin statusu dəyişərsə, həmin şagirdlərin başqa bir məktəbə köçürülməsi tövsiyə oluna bilər. Əgər valideynlər həmin məktəbdən narazıdırlarsa, o zaman övladlarını istənilən digər məktəbə köçürmək hüququna malikdirlər”.
Onu da xatırladaq ki, 2026-2027-ci tədris ilindən etibarən lisey və gimnaziyalara qəbul yalnız 7-ci siniflər üzrə həyata keçiriləcək.
