Xaçmaz rayonunda Abşeron və Quba–Xaçmaz iqtisadi rayonları üzrə iclas keçirilib.
Shimal.News xəbər verir ki, görüş Sudan İstifadəedənlər Birliklərinin (SİB) fəaliyyətinin təkmilləşdirilməsi, su resurslarından səmərəli istifadə, kənd təsərrüfatında fermerlərə suyun real tələbat əsasında verilməsi, həmçinin suölçmə qurğularının quraşdırılması məsələlərinin müzakirəsinə həsr olunub.
İclasda Kənd Təsərrüfatı nazirinin müavini Sarvan Cəfərov, Azərbaycan Dövlət Su Ehtiyatları Agentliyinin sədr müavinləri İlham Bayramov və İlqar Gülməmmədov, Regional Su Meliorasiya Xidmətinin İdarə Heyətinin sədri Zakir Quliyev, qurumun tabeliyində olan yerli istismar idarələrinin rəhbərləri, Dövlət Aqrar İnkişaf Mərkəzlərinin nümayəndələri və Sudan İstifadəedənlər Birliklərinin rəhbərləri iştirak ediblər.
Müzakirələr zamanı kənd təsərrüfatında suvarma proseslərinin optimallaşdırılması, suyun bölüşdürülməsinin ədalətli və şəffaf təşkili, dövlət qurumları ilə su istifadəçiləri arasında koordinasiya və məlumat mübadiləsinin gücləndirilməsi, su itkilərinin azaldılması və su resurslarından qənaətlə istifadə məsələləri ön plana çəkilib.
