Xaçmazda "Dini radikalizmlə mübarizə və gender bərabərliyi" mövzusunda maarifləndirici görüş keçirilib. Bu barədə ShimalNews 1 dekabr tarixində Xaçmaz Rayon Gənclər və İdman İdarəsinə istinadən məlumat verir.
Tədbir icra hakimiyyəti, Gənclər və İdman İdarəsi, Dini Qurumlarla İş üzrə Dövlət Komitəsinin Şimal şöbəsi və Heydər Əliyev Mərkəzinin birgə təşkilatçılığı ilə baş tutub.
Görüş iştirakçıları dini radikal və ekstremist meyillərin tarixi, təbliğatı, hədəf kütlələri və fəsadları barədə maarifləndiriliblər. Xalqımızın zəngin milli-mənəvi, tolerant və multikultural dəyərlərinin fəal təbliğ edilməsinin əhəmiyyəti vurğulanıb.
Daha sonra qeyd olunub ki, hazırda həyata keçirilən gender siyasəti nəticəsində ölkəmizdə qadınların hərtərəfli inkişafı üçün zəruri şərait yaradılıb. Gənc nəslin tərbiyəsi, savadı, mədəniyyəti, zehni inkişafı, vətənpərvərliyi qadınlardan da çox asılıdır.
Sonra tədbir diskussiya şəraitində davam edib, iştirakçıların sualları cavablandırılıb.
