Xaçmaz Tarix-Diyarşünaslıq Muzeyinin Xalça Muzeyi filialında 26 Noyabr — Azərbaycan Kələğayı Günü münasibətilə “Azərbaycan kələğayısı” adlı tədbir təşkil olunub.
Shimal.News xəbər verir ki, tədbirdə kələğayının qadın ismətinin və milli kimliyimizin simvolu kimi əhəmiyyəti, eləcə də naxışların daşıdığı mənalar haqqında danışılıb.
Bildirilib ki, qədim tarixə malik kələğayılar bir zamanlar Azərbaycanın Gəncə, Şuşa, Şəki və Basqal kimi mərkəzlərində istehsal olunub. Xüsusilə Basqal ölkənin ən böyük ipəkçilik ocaqlarından biri kimi tanınıb.
Kələğayı bu gün də sevilərək istifadə edilir və dövlət tərəfindən bu sahəyə xüsusi qayğı göstərilir. 2003-cü ildən Basqalda “Kəlağayı” İpək Mərkəzi fəaliyyət göstərir, həmçinin burada interaktiv “Kəlağayı” muzeyi yaradılıb. Kələğayı sənəti 2014-cü il noyabrın 26-da UNESCO-nun Qeyri-Maddi Mədəni İrs Siyahısına daxil edilib.
Sonda məktəblilər tərəfindən mahnılar, rəqslər və şeirlər təqdim olunub.
