Xaçmaz rayonunda yağan intensiv yağışlar sel və torpaq sürüşməsi ilə nəticələnib.
Shimal.News-un əldə etdiyi məlumata görə, hadisə Köhnə Xaçmaz kəndində, Qudyalçayın kənarında yerləşən Fətəli Xan Xoyski küçəsində qeydə alınıb.
Leysan yağışlarından sonra yaranan sel suları torpaq kütləsinin çaya doğru sürüşməsinə səbəb olub. Nəticədə ərazidə yerləşən yaşayış evləri üçün ciddi təhlükə yaranıb.
Yaxınlıqda yaşayan sakinlər bildirirlər ki, uçqun hər keçən gün evlərə doğru yaxınlaşır. Onların sözlərinə görə, əgər qısa müddət ərzində tədbir görülməzsə, torpaq sürüşməsi nəticəsində mənzillərin uçma riski var.
Sakinlər aidiyyəti qurumlara müraciət edərək vəziyyətə təcili müdaxilə olunmasını və təhlükənin aradan qaldırılması üçün tədbir görülməsini tələb edirlər.
