Xaçmaz Mənzil-Kommunal Təsərrüfatı İdarəsinə məxsus zibil daşıyan avtomobil hərəkətdə olarkən yanacağı bitib və maşın yolun ortasında qalıb.
Bu barədə Shimal.News-a məlumat verən sürücülərin bildirdiyinə görə, hadisə Nəriman Nərimanov küçəsində qeydə alınıb. Hərəkət axınına əks istiqamətdə dayanan “KamAZ” maşınların hərəkətinə ciddi maneə yaradıb.
Sakinlərin sözlərinə görə, bu, o qədər də ciddi problem olmasa da, tullantıların üstüaçıq avtomobildə daşınması antisanitar vəziyyət yaradır. Zibil qutularını hündürlüyə qaldırmaq mümkün olmadığından, tullantılar əvvəlcə yerə tökülür, daha sonra isə bellə avtomobilə yığılır. Küləkli havalarda daşınan tullantılar ətrafa yayılır ki, bu da sanitariya normalarına ziddir.
Görünən odur ki, idarə texniki təminat baxımından ciddi çətinliklərlə üzləşir.
