Xaçmazın Susayqışlaq kəndində yerləşən fermada mühafizəçi kimi işləyib, oğurluq edən Anar Kərimlinin (soyadı şərti) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın məlumatına görə, Sumqayıt Apellyasiya Məhkəməsində hakim Məhəmmədəli Rzayevin sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib, 7 il müddətinə azadlıqdan məhrum olunmaq hökmü qüvvədə qalıb.
İttihama görə, Anar Kərimli 2021-ci ilin sentyabr ayından 02 mart 2022-ci il tarixədək olan müddət ərzində zərərçəkmiş Mahir Əsədova (şərti) məxsus fermada çalışdığı müddət zamanı ümumilikdə 73.100 manat dəyərində oğurluq edib. Eləcə də 3300 manat dəyərində 22 baş qoyunu, 2200 manat dəyərində olan 1 baş inək və inəyin 6 aylıq balasını, 60.000 manat dəyərində olan 15.000 ədəd farel balığını, 7.500 manat dəyərində olan 5 ədəd havalandırıcı mühərriki və 4 ədəd balıqlara su vermək üçün nəzərdə tutulmuş mühərriki gizli olaraq talayıb.
