İyunun 25-də təhsilverənlərin sertifikatlaşdırılması prosesinin test imtahanı mərhələsində Quba-Xaçmaz Regional Təhsil İdarəsinin tabeliyindəki ümumtəhsil müəssisələrinin müəllimləri olan ana və qızı da yüksək nəticə göstəriblər.
“Azərbaycan müəllimi” onların təəssüratlarını oxucularla ilə paylaşır.
“Yüksək nəticə göstərən müəllimlərin fəaliyyətinin dəyərləndirilməsi məzunların müəllimlik peşəsinə həvəsini artırır”
Nailə Arzumanova Xaçmaz şəhəri Cəfər Cabbarlı adına 6 nömrəli tam orta məktəbin fizika müəllimidir və sertifikasiyada 55 bal toplayıb. Onun sözlərinə görə, 33 ildir ki, müəllim kimi fəaliyyət göstərir və peşəsini çox sevir. İmtahan prosesində çətinlik çəkmədiyini əlavə edən müəllim sualların onun üçün orta səviyyədə olduğunu deyir: “Müəllimlərə məsləhətim o olar ki, tədris etdiyi fənni dəqiq və dərindən öyrənsinlər, həmişə öz üzərlərində işləsinlər”.
Sertifikatlaşdırmanın əhəmiyyətinə toxunan Nailə Arzumanova bildirir ki, bu proses müəllimlərin peşəkarlıq səviyyəsini ölçür:
“Sertifikatlaşdırma müəllimlərin öz bilik və bacarıqlarının daha da artırılması üçün motivasiyadır. Yüksək nəticə göstərən müəllimlərin fəaliyyətinin dəyərləndirilməsi yeni məzun olmuş tələbələrin müəllimlik peşəsinə həvəsini artırır”.
“Məqsədim yüksək nəticə göstərmək idi və buna nail oldum”
Xanım Məmmədəliyeva Xaçmaz şəhəri Mehman Məhəmmədov adına 4 nömrəli tam orta məktəbin fizika müəllimidir və sertifikatlaşdırmada 58 bal toplayıb. 2019-cu ildə ilk dəfə müəllimlərin işə qəbul (MİQ) imtahanında mümkün 60 baldan 44-nü toplayaraq Xaçmaz şəhəri Ə.Rustəmov adına Sərkərli kənd ümumi orta məktəbində müəllim kimi fəaliyyətə başlayıb. 2023-cü ildə yenidən MİQ imtahanında iştirak edərək 100 baldan 70-ni toplayaraq hazırda işlədiyi orta məktəbdə çalışıb.
“Sertifikatlaşdırmaya sentyabrdan hazırlaşmağı düşünürdüm, amma iş, ailə qayğıları səbəbindən mümkün olmurdu. Son iki ayı artıq qarşıma məqsəd qoyub imtahana ciddi şəkildə çalışmışam. Ən çox narahatlığım kurikulum suallarından idi. İmtahandan keçəcəyimə əmin idim, yüksək nəticə göstərmək məqsədim idi və buna nail oldum. İmtahana son 5 gün qalmış isə yalnız testlər işləməyə üstünlük verdim. İmtahan sualları orta çətinlikdə idi, çətinliyim sadəcə kurikulum üzrə olan inteqrasiya sualında oldu, məndə çaşqınlıq yaratdı. İmtahanı 1 saata bitirmişəm”, – deyir Xanım müəllim.
Sertifikasiyada az bal toplayan müəllimlərə Xanım Məmmədəliyeva dərsliklərə üstünlük vermələrini, nəzəri suallar üzərində daha çox çalışmalarını tövsiyə edib: “Məncə, hər bir müəllim öz üzərində çalışmalı, yeniliklərə açıq olmalıdır. Bu səbəbdən sertifikatlaşdırmanın əhəmiyyətinin vacib olduğunu düşünürəm”.
