Xaçmaz şəhərinin Hacı Zeynalabdin Tağıyev küçəsində yerləşən bir neçə qurumuş ağac artıq illərdir ki, yerli sakinlərin narahatlığına səbəb olur.
Shimal.News-a müraciət edən vətəndaşların sözlərinə görə, ağaclar təxminən 5 ildir ki, qurumuş vəziyyətdədir. Onların kəsilməsi üçün müvafiq qurumlara dəfələrlə müraciət olunub.
Sakinlər bildirirlər ki, Ekologiya və Təbii Sərvətlər Nazirliyinin ərazi idarəsi ağacların sakinlər tərəfindən kəsilməsinə icazə vermir, lakin özləri də bu müddət ərzində heç bir tədbir görməyiblər.
Şikayətçilər qeyd edirlər ki, əgər bu məsələ zamanında həll edilsəydi, artıq həmin ərazidə yeni ağaclar əkilər və yaşıllıq yaradılmış olardı. Hazırda isə küçədə 5 qurumuş ağac qalmaqda davam edir.
Sakinlər aidiyyəti qurumlardan problemin həlli üçün operativ tədbirlər gözləyirlər.
