Xaçmaz rayonunda 60.000 kubmetr tullantı sularının təmizləyici qurğular kompleksi istifadəyə verilib. Bu haqda ShimalNews 16 dekabr tarixində Azərtac-a istinadən məlumat verir.
Qurğu Gülalan kəndi ərazisində inşa olunub. Onun vasitəsilə Xaçmaz, Quba və Qusar şəhərlərinin, həmçinin “Şahdağ” Turizm Mərkəzinin tullantı suları təmizlənərək kənarlaşdırılacaq.
Çirkab suların daxil olması uzunluğu 1000 metr, təmizlənmiş suyun Qudyalçay hövzəsinə axıdılması isə uzunluğu 1800 metr, diametri 1400 millimetr olan borularla təmin olunur.
Sutəmizləyicinin inşası Azərbaycanın və Yaponiya Beynəlxalq Əməkdaşlıq Agentliyinin birgə maliyyələşdirdiyi “Kiçik şəhərlərdə su təchizatı və kanalizasiya layihəsi” çərçivəsində baş tutub.
Açılış mərasimində “Azərsu” ASC-nin sədr müavini Etibar Məmmədov, Yaponiyanın Azərbaycandakı səfiri Cuniçi Vada, Xaçmaz Rayon İcra Hakimiyyətinin başçısı Elnur Rzayev iştirak ediblər.
