Xaçmaz rayonunun Mehrəliqışlaq kənd ümumtəhsil məktəbində yeni bir təşəbbüsün - “Telefonsuz Məktəb” layihəsinin tətbiqinə başlanılıb.
Shimal.News xəbər verir ki, bu barədə Xaçmaz rayonu üzrə təhsil sektorunun müdiri Qələmşah Dostuyev məlumat verib.
“Layihənin əsas məqsədi dərs zamanı müəllimlərin mobil telefonlardan istifadəsinin qarşısını almaqla, tədris prosesinin keyfiyyətini artırmaqdır.
Uzun müddətdir bu istiqamətdə maarifləndirmə işləri aparıldıqdan sonra müəllimlərin razılığı ilə layihənin icrasına başlanılıb.
Layihənin mahiyyəti ondan ibarətdir ki, müəllimlər dərsə mobil telefonsuz daxil olurlar. Bu isə dərs zamanı baş verə biləcək zəng və mesajların müəllimlərin, şagirdlərin diqqətini yayındırmasının, eləcə də 45 dəqiqəlik dərs vaxtı ərzində zaman itkisinə səbəb olan halların qarşısını almağa xidmət edir.
Bundan əlavə, bu təşəbbüs şagirdlər üçün də müsbət davranış nümunəsi kimi qiymətləndirilir”,- deyə o bildirib.
Qeyd edək ki, müəllimlər bu prosesi tam razılıq əsasında həyata keçirir və öz təşəbbüsləri ilə məktəbdə xüsusi rəf hazırlayıblar. Dərsə gedən zaman telefonlarını həmin rəfdə saxlayaraq dərs prosesinə qoşulurlar.
