Xaçmaz rayonunda süd emalı sexində nöqsanlar aşkar edilib. Bu haqda 12 iyun tarixində ShimalNews Qida Təhlükəsizliyi Agentliyinə (AQTA) istinadən məlumat verir.
Ağçay kəndində fəaliyyət göstərən, fiziki şəxs Azər Sultanova məxsus süd emalı sexində plandankənar yoxlama keçirilib. Müəssisədə sanitar-gigiyena qaydalarına əməl olunmadığı, texnoloji ardıcıllıq prinsipinin pozulduğu və digər nöqsanlar müəyyən edilib.
Bundan əlavə, mənşəyi məlum olmayan süddən hazırlanmış və üzərində etiket məlumatları olmayan pendir aşkarlanıb. Ümumi çəkisi 1500 kq olan süd məhsulundan nümunələr götürülüb və Qida Təhlükəsizliyi İnstitutunun müvafiq laboratoriyasına təqdim edilib.
Aşkarlanmış nöqsanlarla bağlı Azər Sultanov barəsində inzibati protokol tərtib edilib. Sexin fəaliyyəti isə məhdudlaşdırılıb.
