Özünü Xaçmaz rayon sakini kimi təqdim edən şəxs Sumqayıtda kirayə qaldığı evi talan edib və satışa çıxarıb. Bu barədə ShimalNews 20 dekabr tarixində Lent.az-a istinadən məlumat verir.
Sumqayıt sakini Akif Bayramov hadisənin necə baş verdiyini danışıb:
“Təxminən 40-45 yaşlarında olan kişi özünü Vətən müharibəsi qazisi kimi təqdim edib evimdə kirayə qaldı. Qazi olduğuna inanıb pul da almadım. Hadisələr dekabrın ortaları baş verib. Kirayəşinin adı Əfqandır. Xaçmaz rayonundan olduğunu demişdi. Deyirdi ki, Suqovuşanda döyüşüb, iki medal alıb. Bizə də qazi olduğunu dediyi üçün rahatlıqla evimizi kirayəyə verdik. Yanında 25 yaşlarında bir qız da vardı. Əfqan evimin həyətindəki köhnə “Zaporojets” markalı avtomobili kəsib-doğrayaraq satıb. Həyətdəki dəmir kanalizasiya borularını, pəncərələrin karnizini, hamamdakı əşyaları götürüb satıb. Evimi də satışa qoyub. Kirayəşinim özünü ev sahibi kimi təqdim edərək evi satdığı adamdan 1700 manat da beh alıb. İndi onunla əlaqə saxlamaq mümkün deyil, yoxa çıxıb”.
Zərərçəkmiş başına gələnlərlə bağlı polisə müraciət edib. Polis Şöbəsində Əfqan Məmmədovun dələduz olduğu və bundan qabaq dəfələrlə oxşar əməllər törətdiyi məlum olub.
Hazırda polis tərəfindən araşdırmalar aparılır.
