Xaçmaz rayonundan olan şəhid Nazir Xurşudovun mövlud günüdür. Bu haqda ShimalNews 1 fevral tarixində məlumat verir.
Nazir Xurşudov 1985-ci il fevralın 1-də Çaykənarı kəndində anadan olub. O, Milli Qəhrəman Yavər Şahbazov adına tam orta məktəbi bitirib. Hərbi xidməti bitirdikdən bir müddət sonra öz istəyi ilə ordu sıralarına yazılıb. Ümumilikdə 35 illik ömrünün 11 ilini hərbidə keçirən Nazir bir sıra mühüm hərbi əməliyyatların da iştirakçısı olub. O, Aprel döyüşlərində, eləcə də Tovuz döyüşlərində qəhrəmancasına döyüşüb.
Vətən müharibəsi zamanı Ağdam, Füzuli, Cəbrayıl və Xocavənd rayonları uğrunda gedən hərbi əməliyyatlarda iştirak edib. O, oktyabrın 21-də Xocavənd istiqamətində gedən döyüşlərdə qəhrəmancasına şəhid olub. Şəhidimiz oktyabrın 28-də doğulduğu Çaykənarı kəndində dəfn olunub.
Ölümündən sonra "Vətən uğrunda” və "Cəbrayılın azad olunmasına görə” medalı ilə təltif edilib.
Ailəli idi. 2 oğlu Vətənə əmanət qalıb.
Xaçmazda Vətən müharibəsi şəhidi kiçik çavuş Nazir Xurşudovun xatirəsinin əbədiləşdirilməsi haqda məlumat vermişdik.
