Bu gün Xudat şəhərində anadan olmuş Azərbaycan Respublikası Ali Məhkəməsinin sədri Ramiz Rzayevin doğum günüdür. Bu barədə ShimalNews 25 fevral tarixində məlumat verir.
Əməkdar hüquqşünas R.Rzayev 1953-cü il fevralın 25-də anadan olub. Hüquq fakültəsini bitirib, hərbi xidmət keçdikdən sonra Bakı şəhərinin Nərimanov Rayon Prokurorluğunda müstəntiq, İstintaq İdarəsində baş müstəntiq, Baş Prokuror yanında xüsusi mühüm işlər üzrə müstəntiq, Xüsusi Mühüm İşlər üzrə İstintaq Şöbəsinin böyük prokuroru işləyib.
Daha sonra, 1992-1993-cü illərdə Dəvəçi (indiki Şabran) rayon prokuroru, 1993-1995-ci illərdə Beyləqan rayon prokuroru, 1995-2000-ci illərdə Azərbaycan Respublikasının Hərbi Prokuroru vəzifələrində çalışıb.
Azərbaycan Respublikası Prezidentinin 25 may 1998-ci il tarixli Fərmanı ilə R.Rzayevə general-mayor ali hərbi rütbəsi, 17 iyun 2000-ci il tarixli Fərmanı ilə III dərəcəli, 17 yanvar 2002-ci il tarixli Fərmanı ilə II dərəcəli dövlət ədliyyə müşaviri rütbəsi verilmişdir.
2000-2005-ci illərdə Azərbaycan Respublikası Baş prokurorunun birinci müavini olmuşdur. 2005-ci ilin aprelin 19-dan Azərbaycan Respublikası Ali Məhkəməsinin sədridir. 2005-ci ildən Azərbaycan Respublikası Məhkəmə-Hüquq Şurasının üzvüdür.
Sonuncu dəfə cari ilin 11 fevral tarixində Prezident İlham Əliyev Ali Məhkəmənin yaradılmasının 100 illiyi münasibətilə Ramiz Rzayevi “Şərəf” ordeni ilə təltif etmişdir.
Ailəlidir, 3 övladı var.
